Кыргызстандын аскердик контингенти 1941-1945-жылдардагы Улуу Ата Мекендик согуштагы Жеңиштин 80 жылдыгына арналган парадга кетти. Бул тууралуу Куралдуу күчтөрдүн Улуттук гвардиясынан билдиришти.
Маалыматка караганда, бүгүн, 24-апрелде Орусиянын Коргоо министрлигинин «Кант» авиациялык базасы аркылуу Кыргызстандын Улуттук гвардиясынын параддык эсеби Совет элинин 1941-1945-жылдардагы Улуу Ата Мекендик согуштагы Улуу жеңишинин 80 жылдыгына арналган аскердик парадда Москва жана Беларустун Минск шаарларына учуп кетти.
«Бул ардактуу милдет, алардын саптык даярдык деңгээлин эске алуу менен Улуттук гвардиянын аскер кызматчыларына, тактап айтканда Ардак кароол ротасына жүктөлгөн. Бул гвардиячылардын Кыргызстандан тышкары катышкан биринчи парады эмес», — деп айтылат маалыматта.
Улуттук гвардиянын Ардак кароол ротасы Пекиндеги, Москвадагы жана Минскидеги аскердик параддарга катышып, парад көрүүчүлөрүн суктандырып, параддын командачыларынан мыкты бааларды жана жоопторду алып, ар дайым мыкты саптык даярдык жана түздөнүү жактарынан өзгөчөлөнүп келген.
