Акыйкатчы Жамиля Жаманбаева Ысык-Көлдө зордукталган экинчи топтогу майып кызга тиешелүү мамлекеттик органдарды кечиктирилгис жардамдарды көрсөтүүгө чакырды. Бул тууралуу Акыйкатчы институнан билдиришти.
Жаманбаеванын айтымында, өзгөчөлүгү бар жарандардын кордолушу өтө кейиштүү жана орчундуу көйгөй.
“Мындай жарандар ансыз да мамлекеттик деңгээлде өзгөчө корголууга муктаж. Тилекке каршы, майыптыгы бар кыздарыбыздын кордолушу мени өтө тынчсыздандырат. Мамлекеттик жана укук коргоо органдары өзгөчөлүгү бар жарандарга кордук көрсөткөндөргө катаал чараларды көрүшү керек. Биз баарыбыз биргеликте өзгөчөлүгү бар жарандарыбызга коопсуз шарт түзүп, жетиштүү деңгээлде колдоого алышыбыз зарыл”, — деди акыйкатчы.
Акыйкатчы Институтунун Ысык-Көл облусундагы өкүлчүлүгү майыптыгы бар кыздын зордукталышы тууралуу маалымат түшөр замат кечиктирилгис зарыл чараларды көрүштү. Жабырлануучунун апасына укуктук жана юридикалык жардамдарын көрсөтүштү.
Ошону менен катары эле, акыйкатчынын тапшырмасы менен акысыз жактоочу берүүгө көмөк көрсөтүп, кызга тажрыйбалуу психологдун жардамы дайындалды.
Акыйкатчынын өкүлү Ысык-Көл облусунун жаңы дайындалган прокурору менен жолугуп, бул ишти жеке көзөмөлүнө алууну сунуштады. Жабырлануучу кыздын ата-энеси милиция кылмышка шектүүлөрдүн бирин кармабай жатканына нааразы болууда.
“Кызым 24 жашта экинчи топтогу майып, 20 пайыз гана угат жана жакшы сүйлөй албайт. Кызымдын майыптыгынан пайдаланып, уурдап кетип, ээн талаада таштардын арасынан зордукташкан. Ошол учурда кызымдын буту сынган. Анан мал сарайга алып барып, үч сутка бою камап алып, сабап, кордоп, зордуктаган. Азыр кызымдын психологиялык абалы оор, ага атайын адистердин жардамы керек. Бүгүнкү күндө, кызымды зордуктагандардын бирөөсү эркиндикте жүргөнү мени өтө капалантат. Кызымды кордогондордун баары тиешелүү жазаларын алып, адилет чечим кабыл алынса экен дейм”, — деп ыйлады кыздын апасы.
