Бишкек шаарынын Октябрь райондук соту 25 жаштагы Айтурган Маматкулованын өлүмү боюнча өкүм чыгарды.
Маалыматка караганда, анын жолдошу Кылмыш жаза кодексинин 128-беренеси менен күнөөлүү деп табылган. Ал 5 жылга эркиндигинен ажыратылган. Бирок Кылмыш жаза кодексинин 82-беренесинин негизинде 3 жылдык мөөнөткө пробациялык көзөмөл колдонулган.
- 2024-жылы 7-июлда саат 08:55 чамасында Бишкек ШИИБдин «102» кызматына Бишкектеги ооруканалардын биринде 1998-жылы туулган келин каза болгону тууралуу маалымат түшкөн. Аталган факты боюнча өзүн-өзү өлтүрүүгө жеткирүү беренеси менен кылмыш иши козголгон. Кылмышка шектүү катары анын 1998-жылы туулган жолдошу кармалып, убактылуу кармоочу жайга киргизилген.
- Келин классташ баласына турмушка чыгып, жыл өтпөй Бишкектеги Тез жардам ооруканасына өтө оор абалда түшкөн. Дарыгердин баштапкы корутундусу боюнча бейтап дарыдан ууланган. Жолдошу болсо келинчеги өмүрүнө өзү кол салганын билдирип келген. Бирок көз жумган келиндин жакындары күйөө баласын күнөөлөп, кызынын өлүмүнө жолдошу себепкер деп айыпташкан.