«Алтын кум» эс алуучу жайындагы аквапаркта 18 жаштагы Станислав Ситниковдун өлүмү боюнча бир катар экспертизалар дайындалды. Бул тууралуу бүгүн, 19-октябрда маалымат жыйында Ички иштер министрлигинин тергөө кызматынын ага тергөөчүсү Азамат Дүйшеналиев билдирди.
Анын айтымында, эң негизги экспертиза — экологиялык техникалык экспертиза, анын жыйынтыгы азырынча даяр эмес. «Бардык корутундуларды алгандан кийин бул кылмыш иши боюнча юридикалык баа берилет«, — деди ал.
Станислав Ситников 27-июлда Ысык-Көлдө каза болгон. Аны аквапарктын насостук түтүгү соруп кеткен. 30-июлда жерге берилген жаш жигиттин кан жутуп турган жакындары маркумду эскеришкен.
