Нарындагы Орто-Нура айылында 7 жаштагы кыз киши колдуу болгон. Шектүү катары мас абалындагы 1959-жылы туулган ошол эле айылдын тургуну кармалган.
СЕРЕП МЕДИА маалымат агенттиги кыздын атасынын бир тууганы менен байланышканыбызда, шектүүнүн үй-бүлөсү айылдан көчүп кеткени маалым болгон.
«5 бир туугандын үчүнчүсү болчу. Мектепке 2-3 чакырым алыс барып-келип окучу. Кышында атасы унаа менен ташып жүргөн. Күн жылып, жазгы талаа иштери башталганда, алып барып-алып келүү үзгүлтүккө учурап калып жаткан. Азыр ата-энесине да оор болуп жатат. Кызыбыз мектептен кечигип жатканынан издеп баштап, ушундай оор нерсеге туш болдук. Мындан улам айылда арак сатуу маселеси да каралды. Шектүү өмүр бою эркинен ажыратылат деген ойдобуз жана ушундай талап коёбуз. Эгер өлкөдө акыйкаттык болсо, аны өмүр бою эркинен ажыратыш керек. Муну өлүм жазасына тартуу аздык кылат», — деди ал.
28-апрель күнү саат 21:00 чамасында Нарын районунун Орто-Нура айылынын тургуну милицияга 2016-жылы туулган кызы саат 15:30 чамасында мектептен чыгып, ошол бойдон үйүнө келбей жатканы тууралуу маалымдаган.
- Окуучу кыз Орто-Нура айылында жайгашкан үйүнөн мектепке жөө барып-келип окуп жүргөн. 28-апрель күнү саат 12:00 чамасында өзү жалгыз мектепке кетип, кайра саат 15:30да сабактан чыгып, болжол менен саат 17:00-17:30 аралыгында үйүнө келбей калгандыктан, апасы милиция кызматына билдирип жана айылдыктардын WhatsApp группасына кызы жок болуп жаткандыгы тууралуу жазган. Айылдын тургундары чогулуп издеп жүрүшүп, саат 22:10 чамасында кыздын жансыз денесин Орто-Нура айылында киши жашабаган үйдүн ичинен табышкан. Сыртынан кароо жүргүзүүдө күч колдонулган белгилери аныкталган.
- Ыкчам-иликтөө иштеринин жүрүшүндө, милиция кызматкерлери тарабынан кылмышка шектүү делип, 1959-жылы туулган Орто-Нура айылынын тургуну мас абалында табылды. Аталган факты Нарын РИИБдин кылмыштардын бирдиктүү реестрине катталып, Кылмыш-жаза кодексинин 122 беренесинин (адам өлтүрүү) фактысы менен кылмыш иши козголуп, тиешелүү экспертизалар дайындалган. Кылмышка шектүү Нарын ШИИБдин убактылуу кармоочу жайына киргизилип, тергөө амалдары жүргүзүлүүдө. Бул факты ИИМдин жана Нарын ОИИБдин жетекчилиги тарабынан көзөмөлгө алынган.