Ош облусунун Араван райондук сотунун судьясы тарабынан кызматтык абалынан кыянаттык менен пайдалануу, кызматтык жасалмачылык жана атайылап сот адилеттигине жатпаган чечим чыгаруу фактысы аныкталган. Шектүү тергөө аяктаганга чейин УКМКнын тергөө абагына киргизилген. Бул тууралуу УКМКдан билдиришти.
«Араван райондук сотунун судьясы Д.Н.Б. кызмат абалынан кыянаттык менен пайдаланып, жеке кызыкчылыгын көздөп, жаран З.Б.га Араван районунун аймагында жайгашкан жер тилкесине менчик укугун таанып, билип туруп адилетсиз чечим чыгарган. Бул чечим 2023-жылдын 25-январында сот отуруму учурунда каза болгон күбө А.К.нын көрсөтмөлөрүнүн негизинде чыгарылган. Бирок өлүм күбөлүгүнө ылайык, аталган жаран 2023-жылдын 1-январында каза болгон. Мындан тышкары, сот отурумунун протоколуна ылайык процесстин жүрүшүндө Г.Э. жана Ю.Т. күбө катары да суралгандыгы белгиленген. Бирок тергөөнүн жүрүшүндө көрсөтүлгөн адамдар соттук отурумдарга такыр катышпагандыгы жана каралып жаткан иштин жагдайлары боюнча судья Д.Н.Б. эч кандай көрсөтмө бербегендиги аныкталган», — деп жазылат маалыматта.
Жогоруда көрсөтүлгөн жагдайлар күбөлөрдүн П.С. жана Т.А.нын көрсөтмөлөрү, ошондой эле соттук-кол жазма экспертизасынын корутундусу менен тастыкталган. 13-февралда Судьялар кеңеши судьяны кылмыш жоопкерчилигине тартууга макулдук берген.
Шектүү Кылмыш-жаза кодексинин 337-беренесинин 4-бөлүгү (кызматтык абалынан кыянаттык менен пайдалануу), 346-беренесинин 2-бөлүгү (кызматтык жасалмачылык) жана 352-беренесинин 1-бөлүгү (атайылап адилетсиз чечим чыгаруу) менен айыпталууда.
