Бишкекте Индиянын жаранына кол салуу болду. Аны тоноп кетишкен. Бул тууралуу борбор калаанын Ленин райондук ички иштер башкармалыгынан билдиришти.
Маалыматка караганда, жабырлануучу милицияга арыз жазып, 19-октябрь күнү саат 20:00дөр чамасында Москва көчөсүндөгү үйлөрдүн биринде үч адам бычак менен коркутуп, андан 3 миң доллар, 7 миң сом, төрт телефонун: Айфон 10Х, РедМи Нот 8, РедМи Нот 9 алып кетишкенин билдирген. Мындан тышкары ноутбук, наушник, кол саат, куртка, футболка жана бут кийимдерин тартып алышкан. Арыз ээсинин колу-бутун байлап, качып кетишкен. Келтирилген чыгымдын жалпы суммасы аныкталууда.
Аталган факты РИИБге катталып, Кылмыш-жаза кодексинин 202-беренеси (каракчылык) боюнча сотко чейинки өндүрүш иштери башталган. Тартип сакчылары төрт шектүүнү кармашты. Ленин райондук соту үч адамды Бишкектеги СИЗО-1ге эки айга камакка алды. 17 жаштагы шектүүнү ата-энесинин көзөмөлүнө беришкен.
