Бишкектеги 5-кичи райондо апасын уулу жана кызы менен өлтүрүүгө шектелип кармалган адамдын УКМКнын мурдагы кызматкери экенин жергиликтүү басылмалар жазып чыгышкан. Бул боюнча УКМКдан маалымат беришти.
Шектүү 1986-жылы туулган жаран 2006-жылы Мамлекеттик күзөт кызматына жумушка алынып, 2021-жылга чейин кызмат өтөгөн. «Белгилүү болгондой, Мамлекеттик күзөт кызматы 2010-жылдан кийин жоюлуп, түзүмдүк бөлүм катары УКМКга киргизилген. 2021-жылы пенсияга эмгек стажына байланыштуу УКМКнын 9-кызматынан бошотулган»,- деп айтылат маалыматта.
- 16-февралда Бишкекте 3 адамдын киши колдуу болгону маалым болгон. ИИМден бүгүн, 17-февралда кылмышка шектүү кармалганын билдиришти. Бишкек шаарынын 5-кичи районунда энеси, кызы жана уулунун денесине оор залалдар келтирилген жансыз денеси табылган. Кылмышка шектүү катары Баткен облусунун 1986-жылы туулган тургуну кармалып, Бишкек шаарынын Октябрь РИИБине жеткирилген.