АКИpress маалымат агенттигинде өткөн маалымат жыйында каза болгон 16 жаштагы Атай менен Эрнурдун ата-энелери акыйкаттык издеп кайрылышты. Экөө тең «Сапатта» окушкан.
Атайдын атасы Ниязбек Ажыгуловдун айтымында, уулу 9-июнь күнү досу Эрнурга жардам берүүнү чечип, буга чейин бир топ өспүрүмдөр чогулган Ботаникалык бакчага барган. Эрнурдун апасы Нуржамал Сарыкова айткандай, өспүрүмдөр анын уулуна бычак менен барышкан. Ал жерде Эрнур сабалып, Атай бычакталып, каза болгон.
Кылмышка шектүү катары — А.Р. аттуу окуучу кармалган.
Бир нече күндөн кийин, 13-июнда милицияга Эрнурдун сөөгү табылганы тууралуу маалымат түшкөн. Бала асынып алган. Анын атасы Эркин Акжолов белгилегендей, жигит урушпаган, токтоо жана боорукер болгон.
Атайдын адвокаты жана атасы Октябрь райондук ички иштер башкармалыгынын тергөөчүлөрү кылмыштын негизги уюштуруучусун аныктай элек деп эсептешет. Алардын айтымында, ал дагы «Сапаттын» окуучусу. Маалымат жыйындын катышуучулары бийликтен алардын ишине көңүл буруп, бардык тиешеси барларды жоопко тартууну суранышты.