Чолпон-Атада эки адамдын өлүмүнө алып келген катердин айдоочусунун бөгөт чарасы каралып, ата-энесинин көзөмөлүнө 2 айга өткөрүп берилген.
Ысык-Көл облустук сотунан жабырлануучу тарап ачык айыптоодон баш тартышканын билдиришти.
«Айыпталуучунун жашы жете электигин жана туруктуу жашаган жери жана өздүгүн тастыктоочу документи бардыгын, жасаган кылмышы этиятсыздыктан жасалган кылмыштардын катарына кирерин, жабырлануучулар жекече ачык айыптоодон баш тартышканын эске алуу менен жашы жете элек айыпталуучуга карата бөгөт коюу чарасы катары мыйзамдуу өкүлүнүн көзөмөлүнө өткөрүлдү»,- дешти.
- 23-июль күнү саат 16:30 чамасында Чолпон-Ата шаарында жайгашкан эс алуучу жайларынын биринде суу оюн-зоок кызматын көрсөткөн моторлуу кайыктын айдоочусу көлдүн үстүндө жүргөн “таблетка” баллонун сүйрөтүп бара жатып, теплоходго урунганы белгилүү болгон. Кесепетинен үч адам денесинен жаракат алып, оор абалда Чолпон-Ата шаарынын райондук ооруканасына жеткирилген. Жабыркаган үч адамдын экөөсү алган оор жаракаттардан оорукананын жандандыруу бөлүмүнөн ошол эле күндүн түн чамасында көз жумуп, үчүнчү жабырлануучу хирургия бөлүмүнө жаткырылган. Шектүү кармалып, алдын ала суракта шектүү өз күнөөсүн толугу менен мойнуна алган.