Токмокто карындашын коргоп, ок чыгарган ага абактан чыкты. Маалыматты СЕРЕП МЕДИА маалымат агенттигине карындашы өзү билдирди.
Маалыматка караганда, Чүй облустук сотунун өкүмү менен жабырлануучу тарап менен түзүлгөн келишимди эске алуу менен ага Кылмыш-жаза кодексинин 123-беренеси «аффект абалында киши өлтүрүү» боюнча бир жылдык мөөнөткө пробациялык көзөмөл киргизилген. Ал сот залынан бошотулду.
Өткөн жылдын июль айында милиция Чүй облусунда карындашын кордогон адамга ок чыгарган жаранды кармаган. Окуя 1-июль күнү саат 08:30 чамасында Бишкек-Торугарт унаа жолунда болгон. Милицияга эркек кишинин октон жаракат алгандыгы боюнча билдирүү түшкөн. Ыкчам-тергөө тобу ал жерден 1975-жылы туулган жарандын жансыз денесин табышкан. Жабырлануучу алган жаракатынан улам «Тез жардам» кызматы келгенге чейин каза болгон. 20-июнда СЕРЕП МЕДИА маалымат агенттиги шектүүнүн бир тууган карындашы менен байланышканыбызда, агасы 3 жылга эркинен ажыратылганын билдирген.