13-июнь күнү саат 21:30 чамасында Жайыл райондук ички иштер бөлүмүнүн нөөмөт бөлүмүнө Ак-Башат айылындагы Кучкач-Ата көчөсүндө жол кырсыгы болгондугу тууралуу маалымат түшкөн. Бул тууралуу Чүй облустук милициясынан маалымдашты.
Алдын ала алынган маалыматтарга ылайык, 1994-жылы туулган жаран Р.Б. “Lexus RX 300” үлгүсүндөгү унааны башкарып бара жатып, 2019-жылы туулган М.А. аттуу кызды сүзүп кеткен. Окуядан жабыркаган бала дароо реанимация бөлүмүнө жеткирилген, бирок алган жаракаттарынан эсине келбей каза болгон. Аталган факты Жайыл РИИБде катталып, сотко чейинки териштирүү иштери башталган. Окуя болгон жерге ыкчам-тергөө тобу дароо жөнөтүлгөн. 14-июнда бул факты боюнча Кылмыш-жаза кодексинин 312-беренеси (Автомототранспорт каражаттарынын кыймылынын жана аларды эксплуатациялоонун коопсуздук эрежелерин бузуу) боюнча кылмыш иши козголду.
Тергөө иштеринин алкагында унаанын айдоочусу, 1994-жылы туулган Р.Б. убактылуу кармоо жайына киргизилди. Кылмыш ишинин алкагында бардык зарыл болгон экспертизалар дайындалып, тергөө аракеттери жүргүзүлүүдө. Азыркы учурда жабыркагандардын, мыйзамдуу өкүлдөрүнүн көрсөтмөлөрү алынууда, айдоочунун айдоочулук күбөлүгүнүн бар-жогу, унаанын техникалык абалы жана тиешелүү документтер текшерилүүдө. Бул иш боюнча тергөө иштери Ички иштер министрлигинин жана Чүй облусунун ИИББнын жетекчилигинин көзөмөлүндө. Тергөө улантылууда.