20-августта социалдык тармактарда балдар аянтчасында аялдын балага кол көтөргөн видеосу тараган. Окуя боюнча Жалал-Абад ОИИБден маалымат беришип, териштирүү иштери жүрүп жатканын билдиришкен. Бүгүн, 22-августта милиция маалымат таратып, шектүү камакка алынганын билдиришти.
- 19-август күнү Жалал-Абад ШИИБге Сузак районуна караштуу Октябрь айылынын 1991-жылы туулган тургуну арыз менен кайрылган. Анда 17-август күнү саат 18:30 чамасында Жалал-Абад шаарындагы “Плаза” соода борборунун 4-кабатында 2012-жылы туулган баласын бейтааныш, 30-35 жаштар чамасындагы аял киши бети-башына урганын айткан.
- Аталган маалымат катталып, тергөөгө чейинки териштирүү иштери башталган. Ал эми жабырлануучуга карата атайын соттук-медициналык экспертиза дайындалган.
Натыйжада 2012-жылы туулган өспүрүм баш мээсинин чайкалуусу менен Жалал-Абад облустук балдар ооруканасына жаткырылган. Аталган факты Кылмыш-жаза кодексинин 280-беренеси (бейбаштык) менен катталып, кылмыш иши козголгон. Кылмыш ишине шектүү катары Сузак районунун 1994-жылы туулган тургуну кармалып, Жалал-Абад ШИИБдин убактылуу кармоочу жайына 48 саатка киргизилген. Учурда тергөө амалдары жүрүп жатат.