Сузакта дайынсыз болуп, изделип жаткан 9 жаштагы кыздын жансыз денеси бүгүн, 28-ноябрда табылган. Жалал-Абад ОИИБи маалымат таратып, кыздын үстүндө кийимдери жок абалда болгонун билдиришти.
18-ноябрда Сузак РИИБдин нөөмөт бөлүмүнө Сузак районунун тургуну 1984-жылы туулган Уткирбек Сулайманов ошол эле күнү саат 12:40 чамаларында кызы 2012-жылы туулган Сумая Хосилжанова үйүнөн мектепке чыгып кеткен бойдон дайынсыз болуп жаткандыгын билдирип, арыз менен кайрылган.
«Дайынсыз болуп жаткан кызды издөө иштерине жалпысынан 63 милиция кызматкери, 250 элдик кошуун жана коомчулуктан 150 ыктыярчы тартылып, Сузак айылынын 8540 кожолук, курулуп бүтпөй кароосуз калган 14 имарат, кароосуз калган 25 гараж, Жалал-Абад — Сузак каттамында каттаган 6 маршруттук таксилер жана 78 жеке таксилер текшерүүгө алынган. Атчан ыктыярчылар менен биргеликте эгин-талааларында да издөө иштери жүргүзүлгөн. Ошондой эле 29 камера текшерилген. Бирок кыз бир дагы видеокамерага түшкөн эмес. Издөө иштери Жалал-Абад шаарынын аймагында да улантылган», — деп айтылат маалыматта.
27-ноябрь күнү саат 17:00 чамасында Сузак РИИБге балык уулап жүргөн 1967-жылы туулган Сузак районунун тургуну телефон чалып, Арал айылы аркылуу агып өткөн Көк-Арт дарыясынын жээгинде жаш кыздын жансыз денеси жаткандыгын кабарлаган. Айтылган дарекке Жалал-Абад ОИИБдин жетекчилиги жана тергөө-ыкчам тобу, Сузак РИИБдин начальниги жана орун басарлары, райондун прокурору жана РИИБдин тергөө-ыкчам топтору барышкан жана суунун жээгинен 3-4 метр аралыкта жаткан болжолу 8-12 жашар кыз кишинин жансыз денеси үстүндө кийимдери жок абалда табылган.
Жалал-Абад ОИИБи СЕРЕП МЕДИА маалымат агенттигине окуя болгон жерде жансыз денеге сырттан кароо жүргүзүлүлгөн учурда, оор жаракаттар жана дене мүчөлөрүнүн сынуусу байкалбаганын билдирди. Алгач бул факты Сузак РИИБге «табылган өлүк» болуп катталган. Текшерүү иштеринен кийин Жазык кодексинин 130-беренесинин (киши өлтүрүү) негизинде катталып, сотко чейинки өндүрүш иши ачылып, тиешелүү экспертизалар дайындалган. Учурда тергөө кызматы тарабынан ар кандай божомолдордон турган иш-мерчемдер иштелип чыгып, кылмыштын бетин ачуу максатында ыкчам иш-аракеттер жүргүзүлүп жатат.