Өзбекстандын жараны кызы Бишкекте бир жарым ай мурун жол кырсыгына кабылып, комага түшкөнүн, тиешелүү мекемелер тарабынан жакшы көңүл бурулбай жатканын айтып кайрылган. Бул тууралуу «Азаттык» жазды.
«2-апрелде кызыма чалсам телефон алган жок. Курсташы алып, жол кырсыгы болуп, Тез жардам алып кетти» деди. Азыр абалы оор. Менин кызымдан башка эч кимим жок. Милицияга арыз жаздым, бирок эч ким карган жок»,- дейт кызын карап жаткан апа.
Бул окуя боюнча Бишкек ШИИБ маалымат берип, 2-апрелде болжол менен саат 13:30 чамасында 1999-жылы туулган айдоочу Hyundai Sonata үлгүсүндөгү унааны башкарып бара жатып, Исаакеев көчөсүнүн түндүк багытында жолдун жүрүүчү бөлүгүн кесип өтүп бара жаткан 2000-жылы туулган жаранды сүзүп кеткен.
Окуянын кесепетинен кыз денесинен жаракат алып, Саламаттык сактоо министрлигинин Нейрохирургиялык борборунун жандандыруу бөлүмүнө жаткырылган.
Бул факты боюнча Кылмыш-жаза кодексинин 312-беренеси («Автомототранспорт каражаттарын башкаруу жана пайдалануу эрежелерин атайылап же этиятсыздык менен бузуу, ден соолукка оор зыян келтирүү менен») боюнча кылмыш иши козголуп, 1999-жылы туулган жаран кармалып, убактылуу кармоочу жайга киргизилген.
«Айдоочу спирт ичимдиктерин же психотроптук заттарды колдонгон-колдонбогонун аныктоо үчүн жүргүзүлгөн медициналык кароонун жыйынтыгында, мындай заттардын колдонулганы аныкталган эмес. Мындан тышкары, окуяны ар тараптуу, толук жана объективдүү иликтөө максатында бир нече комплекстүү соттук-медициналык экспертизалар дайындалып, алардын жыйынтыгы боюнча Кыргыз Республикасынын мыйзамдарына ылайык юридикалык баа берилет»,- деп айтылат маалыматта.
