Опузалап пара талап кылуу фактысы боюнча мурда Бишкек ШИИБ тарабынан тергелип жаткан кылмыш ишинин алкагында терс негиздер боюнча кызматтан убактылуу четтетилген Свердлов РИИБдин мурдагы тергөөчүсү акча алгандан кийин кармалды. Бул тууралуу УКМКдан билдиришти.
Милициянын улук лейтенантына карата пара талап кылуу фактысы боюнча кылмыш иши козголду. Жүргүзүлгөн ыкчам-иликтөө иш-чараларынын натыйжасында, мурдагы тергөөчү, милициянын улук лейтенанты жеке кызыкчылыгын көздөп, баюу максатында жаранга кылмыш ишин тергеп жатканын айтып, анын алкагында кылмыш жоопкерчиликке тартам деп коркуткандыгы аныкталган. Бул маселени оң жагына чечүү үчүн 2500 АКШ доллары өлчөмүндө акча талап кылган. Акчанын 165 миң сому электрондук капчыгына которулгандан кийин кармалып, №1 тергөө абагына киргизилди.
Буга чейин ага Кылмыш-жаза кодексинин 209, 379 жана 337-беренелери боюнча кылмыш иштери козголуп, ал ээлеген кызматынан убактылуу четтетилген.
