Бишкек шаарынын Ленин райондук соттук аткаруучулар кызматынын айрым кызматкерлери туруктуу коррупциялык схеманы уюштурууга шектелип УКМКнын тергөө абагына камакка алынды. Бул тууралуу УКМКдан билдиришти.
Сот аткаруучулар капитан А.А.А. жана лейтенант М.Т.С. жарандардан опузалап акча талап кылуу жана алуу үчүн ар кандай шарттарды түзүшкөн, түрдүү маселелерди карабоо же кечеңдетүү – чек арадан өтүү боюнча чектөөлөрдү алып салуу, карызды жабуу боюнча маалыматты жөнөтпөө оң чечим үчүн пара алганга чейин.
Жарандык талаш-тартыштарды кароонун жыйынтыгы боюнча сот чечими, адатта, тараптардын биринин пайдасына чыгарылат жана сот аткаруучулар анын кызыкчылыгы үчүн белгилүү бир аракеттерди жасоого милдеттүү (камакка алуу, карызды өндүрүү, карызды кайтарууга көмөктөшүү). Бирок А.А.А. жана М.Т.С. бул процесстерди создуктуруп, аларга мыйзамсыз акчалай сыйлык берилмейинче өздөрүнүн функционалдык милдеттерин аткарышкан эмес.
Аталган факты боюнча Кылмыш-жаза кодексинин «Кызмат абалынан кыянаттык менен пайдалануу» беренеси менен алар кылмышка шектелип, УКМКнын тергөө абагына камакка алынды. Учурда аталган мыйзамсыз аракеттерге тиешеси бар башка кызмат адамдарын аныктоо жана жоопкерчиликке тартуу боюнча тергөө-ыкчам иш-чаралары улантылууда.
