Ош аэропортун реконструкциялоодо мыйзам бузуулар болгону аныкталды. Бул тууралуу Башкы прокуратурадан билдиришти.
2020-жылдын сентябрь айынан 2021-жылдын январь айына чейинки аралыкта «Манас» эл аралык аэропорту» ААКнын жана ушул акционердик коомдун Ош филиалынын аэродромдук кызматынын айрым жооптуу кызматкерлери курулуш жана инерттик материалдарына болгон тийиштүү эсептик иш кагаздары жок, Ош эл аралык аэропортунун перронун реконструкциялоо боюнча аткарылган курулуш иштерин мыйзамсыз кабыл алышкандыгынын натыйжасында, курулуш компаниясы тарабынан аткарылган иштеринин көлөмү жана материалдарынын наркы 3,4 млн сомго ашыкча бааланып, мамлекетке ири өлчөмдө зыян келтирилгендиги аныкталды.
Аталган факты боюнча текшерүү материалдары Башкы прокуратурасынын КЖБРне Жазык кодексинин 320-беренеси жана 233-беренеси менен катталып, тергөө амалдарын жүргүзүү үчүн УКМКнын тергөө башкармалыгына тапшырылды.