ИИМдин Баңгизаттарды мыйзамсыз жүгүртүүгө каршы күрөшүү кызматынын ыкчам кызматкерлери баңгизат сатууга бөгөт коюшту. Бул тууралуу ИИМдин басма сөз кызматы билдирди.
Токтогул районунун аймагында 30-35 жаштагы жаран баңгизат жасап, сактап, сатуу менен алектенип жүрөт деген ыкчам маалымат келип түшкөн. Анын негизинде ыкчам тергөө иш-чаралары жүргүзүлгөн жана Бишкек—Ош жолунда 1986-жылы туулган А.Р. аттуу жаран башкарып бара жаткан Форд Фокус үлгүсүндөгү унаа токтотулган. Унаанын салонунан 40 таңгак кара-жашыл түстөгү өзгөчө жытка ээ зат табылган.
Андан кийинки тергөө амалдарынын жүрүшүндө кызматтык иттин жардамы менен А.Р.нын үйүндө тинтүү жүргүзүлгөн. Анын натыйжасында 105 таңгак баңгизат алынган.
Соттук-химиялык экспертизанын корутундусуна ылайык, табылган зат 1 килограмм 182 грамм гашиш экени аныкталган. Шектүү убактылуу кармоочу жайга киргизилип, унаасы айып короого токтотулду.
Учурда бул кылмышка тиешеси бар башка адамдарды аныктоо боюнча ыкчам тергөө иш-чаралары уланууда.
