Оор кылмыш үчүн эл аралык издөөдө жүргөн кыргызстандык Москвадан кармалды. Бул тууралуу ИИМден билдиришти.
Москва шаарында Кыргыз Республикасынын жана Орусиянын ички иштер министрликтеринин кызматкерлеринин биргелешкен ыкчам-издөө иш-чараларынын натыйжасында, изделип жаткан 2004-жылы туулган Кыргызстандын жараны кармалды.
Кылмыш ишинин материалдарына ылайык, 2023-жылы Ош шаарынын аймагынан 1990-жылы туулган жарандын жансыз денеси табылган. Милиция кызматкерлери тарабынан жүргүзүлгөн ыкчам-тергөө иш-чараларынын жүрүшүндө, бул кылмыш ишин жасоого шектелген жарандын өздүгү такталып, ал 2004-жылы туулган жаран болуп чыккан. Ага карата Кыргыз Республикасынын Кылмыш-жаза кодексинин 122-беренесинде (Адам өлтүрүү) каралган кылмыш иши боюнча эл аралык издөө жарыяланган.