Бишкек шаарынын Октябрь райондук прокуратурасы тарабынан жашы жете элек өспүрүмдөн акча талап кылуу фактысы боюнча ИИМдин күзөт кызматынын кызматкерине карата кылмыш иши козголду.
6-июлда милициянын күзөт кызматкери өзүнүн кызматтык ыйгарым укуктарынан чегинен чыгып, электрондук тамеки чегип отурган С.Ю. аттуу өспүрүмдү административдик жоопкерчиликке тартуу жолу менен коркутуп, андан акча талап кылып, банкоматтан чечтирип алган. Моралдык-психологиялык кысымдын кесепетинен жашы жете элек С.Ю. окуя болгон жерден эсин жоготуп, ооруканага жеткирилип, «геморрагиялык инсульт» диагнозу менен оор абалда жандандыруу бөлүмүнө жаткырылган. Ал эми, милиция кызматкери өзүнүн кылмыштуу аракетин жашыруу максатында, оор абалда жаткан өспүрүм баланы окуя болгон жерге калтырып, изин жашырып качып кеткен.
