Таласта жаш келинди өлтүрүүгө шектелип кармалган жолдошу Талас шаарынын жол кыймылынын коопсуздугун камсыздоо боюнча бөлүмдө иштейт. Бул тууралуу облустук ички иштер башкармалыгынан маалымдашты.
29-декабрда жаш келиндин жансыз денеси өз үйүнөн табылганы маалымдалган. Буга удаа эле 1992-жылы туулган келиндин өлүмүнө шектелип, анын 1988-жылы туулган жолдошу кармалганы белгилүү болгон. Каза болгон келиндин денесинде көк ала тактар бар экендиги аныкталган.
Кармалган жаран соттун чечими менен 2 айга камакка алынды. Каза болгон келин 31-декабрда жерге берилди.