21-августта Ысык-Көл облусунун Тоң районундагы Туура-Суу айылында Тоң суусунун деңгээли көтөрүлгөн. Бул тууралуу ӨКМден билдиришти.
Мындан улам суу каптоо коркунучу жаралгандыгы тууралуу маалымат түшүп, адам өмүрүнүн коопсуздугун камсыздоо максатында Тоң райондук №38 өзгөчө кырдаалдар бөлүмүнүн куткаруучулары жеринде иш алып барууда. Куткаруучулар Күн-Чыгыш айыл аймагындагы Балык завод тилкесинин жана Туура-Суу айылынын жашоочуларын коопсуз жайга эвакуациялоону жергиликтүү бийлик өкүлдөрүнө эскертип, суу нугун буруу иштерине чыгып кетишкен.
Туура-Суу гидропостунун маалыматы боюнча, бийик тоолуу Зындан көлү жырылып, суунун көлөмү көбөйгөн. Аталган гидропосттун кызматкери көлдүн жырылуусун тактагандыгы аныкталган.