Бишкек шаарынын Биринчи Май районунун ички иштер башкармалыгына З.С. аттуу жаран жазуу жүзүндө арыз менен кайрылып, анда А.И.ге карата чара көрүүнү суранган. Бул тууралуу Бишкек шаардык милициясынан маалымдашты.
Алдын ала маалыматтарга ылайык, А.И. арыз ээсинин жолдошу 2-мартта Улуттук коопсуздук мамлекеттик комитетинин кызматкерлери тарабынан кармалганын билип, ага карата арыз жазам деп коркуткан. Ошондой эле ал арыз берсе, кырдаал дагы да начарлап кетиши мүмкүн экенин айтып шантаж кылган. Тергөө маалыматтарына ылайык, А.И. өзүнө өзгөчө ири өлчөмдө материалдык пайда алуу максатын көздөп, арыз жазуудан баш тартуу жана арыз ээсинин жолдошунун абалына таасир этиши мүмкүн болгон мындан аркы аракеттерди жасабоо үчүн 50 миң доллар талап кылган.
Бул факты боюнча Бишкек шаарынын Биринчи Май районунун ички иштер башкармалыгынын тергөө кызматы тарабынан Кылмыш-жаза кодексинин 208-беренеси (опузалап талап кылуу) боюнча кылмыш иши козголгон. Тергөө жана ыкчам-издөө иш-чараларынын жүрүшүндө 1971-жылы туулган А.И. жабырлануучу З.С. тарабынан 30 миң АКШ долларын алып жаткан учурда кармалган. Кылмыш-жаза кодексинин 208-беренесинин 3-бөлүгү боюнча кылмыш жасоого шектелип, Жазык-процесстик кодексинин 96-беренесинин негизинде Бишкек шаарынын ИИББнын убактылуу кармоочу жайына киргизилди. Тергөө иштери улантылууда.
