Кечээ, 17-декабрь күнү саат 10:30 чамасында Каракол-Түп жолунда жол кырсыгы катталып, анын кесепетинен 2 адам каза болгон. 9 жаран ар кандай жаракаттарды алып, облустук жана Түп райондук ооруканага жаткырылган.
Алдын ала маалыматтар боюнча, Мазда-Хедос унаасынын 27 жаштагы айдоочусу Караколго бара жатып, жолдун тайгалагына байланыштуу каршы тилкеге чыгып кетип, Каракол-Балыкчы каттамында жүргүнчүлөрдү ташыган Мерседес-Спринтер үлгүсүндөгү унаа менен сүзүшкөн.
Транспорт министрлигинен 4-жол тейлөө ишканасынын жумушчулары 16-декабрда автогрейдер менен аталган жолду тазалап, инерттик материалдарды чачышканын билдиришти. «17-декабрда да инерттик материалдар чачылган. Бул иштер МАИ кызматкерлеринин көрсөтмөсү менен жасалган. Жол тасмасында кар да жок, тайгак дагы эмес. Тергөө жүрүп жатат, 2 айдоочунун канынан анализ алынды, жыйынтыгы чыга элек», — дешти.
