Автоээнбаштык жасаган айдоочуга 15 миң сом айып салынды. Бул тууралуу ИИМдин Жол кыймылынын коопсуздугун камсыздоо башкы башкармалыгынан билдиришти.
Буга чейин социалдык тармактарда БМВ үлгүсүндөгү унаанын айдоочусу Ысык-Көл районунун Бактуу-Долоноту айылында жайгашкан ат майдандын аймагына кирип алып, автоээнбаштык кылгандыгы боюнча видео тараган.
БМВ М8 унаасы табылып, анын 2005-жылы туулган айдоочусу аныкталган. «Унаа Чолпон-Ата шаарындагы айып короого токтотулду жана анын кыймыл аракетине Укук бузуулар жөнүндө кодексинин 189-беренесинин (автоээнбаштык) негизинде протокол түзүлүп, 15 миӊ сом өлчөмүндө айып салынды», — деп айтылат маалыматта.