Бүгүн, 11-сентябрдагы Жогорку Кеңештин жыйынында депутат Эрулан Кокулов фракциянын 10 мүнөтүн сурады.
Ал сөз сүйлөп, айыл өкмөттөрдө коррупциялык схема бар экенин айтты. Таластагы Шумкар-Уя айыл өкмөтүнө барганын, ал жердеги кемчиликтерди айтты. Ал кесиптештерине кайрылып: «Мен түшүнүп жатам. Көбүңөргө Кыргызстандын келечеги деле кереги жок. Укпасаңар да, тынч отуруп тургулачы. Мен Кыргызстан боюнча сүйлөп жатам. Силер дагы шайланып келгенсиңер»,- деди.
Ары жактан бир депутаттын үнү чыкты. «Парламентте да кайым-айтышуулар башталды. «Өзүңдү көрсөтүп жатасың» деген. Мен силерден тынч отурууну суранып жатам»,- деди Кокулов.
Депутат Акылбек Түмөнбаев «Кыргызстандын келечеги сага эле керекпи?» деп залдан кыйкырды. Кокулов ага микрофонго чыгууну сунуштады.
«Мен сизге айтып жатамбы? Мен Акылбек байке, Акылбек мырза деп айттымбы? Мен жалпы айтып жатам. Мына сүйлөшүп отурушпайбы. Ошолорго айтып жатам», — деди Кокулов.
Жогорку Кеңештин төрагасы депутаттарга кайрылып, угуп коюуну суранды.
«Мен бирөөңөргө бир нерсе деп жатамбы? Такыр укпайсыңар. Базарда отургандай кыжы-гужу боло бересиңер. Ушул жерге өкмөт келсе үнүңөр чыкпай калат. Тизилип отуруп каласыңар. Мен далилдеп берем»,- деди Кокулов.
Төрага депутаттын 1 мүнөтү калганын айтты. «Сиздин жалпы депутаттарга баа бергенге акыңыз жок. Сиз кесипештериңизди сыйлаңыз. Өкмөт келгенде унчукпай калган эч ким жок. Өкмөт сизден айырмаланып конкреттүү программалар менен келет. Кунт коюп угуп, суроо беребиз. Эгер сиз сыяктуу ойду-тоону сүйлөсө, ошондой сөз болмок. Кимден коркосуз, кимден коркпойсуз ал сиздин иш. Биз да сизден коркпойбуз. Сыйга сый, сыр аякка бал деген жакшы сөз бар. Сыйга татыктуу болсо сыйлайбыз. Ак карга боло бербей, Жогорку Кеңешти сыйлаңыз»,- деди төрага.
«Мен силерди сыйлайт элем. Эгер спикер — спикер болсо, вице-спикер — вице-спикер болсо, Жогорку Кеңеш коллегиялдык орган болсо. Силер баштагансыңар. Мэр «таракан кууп жүрөт дегенде» бирөөңөр сүйлөдүңөрбү? Ошол учурда депутаттын ыйгарым укугун бирөөңөр коргодуңарбы? Мени эшиктин артына алып барып, «эл үчүн сүйлөп калдың беле?» дегенде унчуккан эмесмин. Кесиптештер, мени ошондо урматтап койсоңор, мен силерди урматтамакмын. Эмнеге мен жумушумду аткарып жатканда тоскоолдук болуп жатса, бирөөңөр сүйлөбөйсүңөр»,- деди депутат.
