Өзгөчө кырдаалдар министри Бообек Ажикеев 11-майда кыргыз элине кайрылуу жасады. Анын айтымында, Орусиянын Кыргызстанга карата «достук эмес саясаты» жөнүндө ушактар байма-бай айтыла баштады. Кайрылууну Өзгөчө кырдаалдар министрлигинин басма сөз кызматы таратты.
«Саясат — бул өтө кылдаат мамилени талап кылган иш. Орусия Кыргызстанды колдой турган биздин башкы өнөктөшүбүз жана досубуз болгонун белгилей кетким келет», — деди ал.
Ажикеев кошумчалагандай, Кыргызстан менен Орусия «эки тараптуу келишимдердин таасирдүү пакетине» кол коюшту, ал анын пикири боюнча, эки мамлекеттин кызыкчылыгына жооп берет. «Албетте, күтүлбөгөн жерден келип чыккан чыр-чатактар, КМШнын ар кайсы аймактарында болуп жаткан окуялар Орусиянын ар дайым тез реакция кылышына жол бербейт. Ыкчам өнүгүп келе жаткан чыр-чатактарга карабастан, Орусия ар дайым акылга сыярлык жана салмактуу чечимдерди кабыл алат”, — деди Өзгөчө кырдаалдар министрлигинин башчысы.
Ал Орусия биздин стратегиялык өнөктөшүбүз экенин белгиледи. «Көптөгөн өлкөлөр экономикалык кризисти башынан өткөрүп жаткан ушул оор күндөрдө күнөөлүүлөрдү издөөнүн кажети жок — иштөө жана достошуу керек. Орусия менен жалпы тарыхыбыз бар. Биздин жалпы келечегибиз бир. Чыныгы досубузду баалай билели”, — деди Ажикеев.
