Садыр Жапаров Дача-СУ окуясы боюнча иш абдан начар жүрүп жатканын жүйө кылып, коомдук комиссия түзүлгөнүн айтты. «Учактын кулашына ким күнөөлүү, жүк кимге таандык болгон жана жабыр тарткандарга чогултулган акчалар кандай бөлүштүрүлгөн?» деген суроолор жоопсуз калууда дейт ал. Мындан улам биз депутаттарга «Бул иш эмнеси менен сырдуу жана сиз кандай суроого жооп алгыңыз келет?» деген суроо менен кайрылдык.
Депутат Акбөкөн Таштанбеков бул кырсык боюнча жаңы эч нерсе чыкпайт деп ойлойт. «Мен учакта отурган учкучтар атайын келип, Дача-СУга кулады дегенден алысмын. Бул кырсык болушу мүмкүн. Эгер ошол учакта бара жаткан жүк боюнча десе, анда шектүү бир нерселерди чыгарса болот. Көп деле сыр чыкпайт болушу керек. Элге кан керек болуп жатат да. Ошол жерде бир күнөөлүүнү табышыбыз керек. Мындай кырсык көп жерлерде болот. Ошол жердеги учкучтарды күнөөлөйбүзбү? Жаңы эмне чыгышы мүмкүн? Атамбаев же башка бирөө ичип алып, учактын рулун кайрып жибердиби? Кеп ошондо болуп жатат», — деди эл өкүлү.
