«Өлкөнүн мамлекеттик символдору өзгөрбөсө жакшы болмок». Бул тууралуу депутат Акбөкөн Таштанбеков 29-ноябрда парламенттин жыйынында билдирди.
Ал өз сөзүндө чек арадан өтүү үчүн канча унаанын номурун алмаштыруу керектигин сурады. Тууну өзгөртүү боюнча мыйзам долбоорунун демилгечилеринин бири Нурланбек Шакиевдин айтымында, мыйзам кабыл алынгандан кийин паспорттор менен унаалардын номурлары дароо өзгөртүлбөйт. Кыргызстандын 33 өлкөдөгү элчиликтеринин, БУУнун жана мамлекеттик мекемелердин желектери, жалпысынан 150 миң желек алмаштырылат.
Таштанбеков эч нерсе өзгөрбөсө желек алмаштыруунун кереги жок экенин баса белгиледи. «Номурду өзүңүз алмаштырасызбы?» — деп сурады ал. Шакиев ал өз каалоосу экенин айтты.
Ошондой эле депутат Таштанбеков күндүн нурлары «мыйзамдагы уурулардын» жылдызына окшошуп калган жокпу деген суроону койду. Буга Шакиев эч кандай окшоштук жок деп жооп берди. «Биз желекти бузууга аракет кылбайбыз, тескерисинче, аны жакшыртууга аракет кылып жатабыз», — деп кошумчалады ал.
