Депутат Айгерим Бешимбаева Бажы кызматынын төрагасынын орун басары Райымбек Матраимовдун конфискацияланган батирлерин кризистик борборлорго жана балдар үйлөрүнүн бүтүрүүчүлөрүнө берүүнү сунуштады. Бул тууралуу ал кечээ, 24-декабрда Жогорку Кеңештин жыйынында айтып чыкты. Эл өкүлү кризистик борборлордун жоктугун жана үй-бүлөлүк зомбулукка кабылгандардын көбөйүп жаткандыгын белгиледи.
«Эмне үчүн Райымбек Матраимовдун батирлерин УКМК кызматкерлери алышы керек? Аларды кризистик борборлорго жана балдар үйлөрүнүн бүтүрүүчүлөрүнө пайдалануу үчүн беришибиз керек», — деди ал.
Вице-премьер Эльвира Сурабалдиева, балким, депутаттар кайрылса, УКМК батирлерди кризистик борборлорго өткөрүп берүүгө макул болот деп жооп берди.
Кечээ, 24-декабрда УКМКнын башчысы Камчыбек Ташиев Бажы кызматынын башчысынын экс-орун басары Райымбек Матраимов келтирилген чыгымды төлөө үчүн накталай акчадан тышкары тогуз батирди жана бир соода борборду мамлекетке өткөрүп бергенин айткан.