15-декабрда депутат Элмурза Сатыбалдиев Бишкек шаарынын мэри Эмилбек Абдыкадыровго ишеним көрсөтпөөнү Жогорку Кеңешке сунуштады.
«Кадр саясаты тууралуу жакшы сөздөрдү айттыңыз, кадрдык башаламандык токтойт деп. Кызматкерлердин кесипкөйлүгүн өзүңөр текшерип чыгарыңарды айттыңар. Сиздин кесипкөйлүгүңүздү ким текшерет?» – деп сурады депутат Сатыбалдиев .
«Президент мени дайындады, ал текшерет, ал баасын берет», — деди борбор калаанын мэри. «Мен билем, президент сизге ишенет, сиз ага ишенесиз. Бул тууралуу четте да, сыртта да бардык жерде айтышат. Өзүңүз кызматыңызды таштап кете аласызбы?» — деп сурады Сатыбалдиев.
«Мындай ой жок. Мен иштегениме 9 ай болду. Бардык пландарды ишке ашыруу ниетим бар. Мэрлер 3-6 ай эмес, 3-5 жыл иштеши керек, анткени бардык маселелерди кыска убакытта чечүүгө болбойт. Мен баарын бүтүрүшүм керек. Мектептер ишке ашырылды, таштандыларды кайра иштетүүчү завод куруу пландаштырылууда, ошондой эле электр автобустарын сатып алуу жана башкалар. Биз сиздер менен иштешүүгө даярбыз”, — деп жооп берди Абдыкадыров.
«Сиз пландарыңызды ишке ашырганда 68 жашка чыгасыз», — деп белгиледи депутат. «Иштеген иш көрүнүп эле калат. Канча жыл иштейм аны мен чечпейм. Муну жетекчилер чечет, суроону аларга бергиле», — деди Бишкек шаарынын мэри.
«Сизди дайындаган адамга жакын болсоңуз, ага барып, «Урматтуу Садыр Нургожоевич, мен карып калдым, мени бошотуңуз» деп айта аласызбы?» — деп сурады Сатыбалдиев.
«Сиз дагы жогорку кызматтарды аркаладыңыз. Кыязы, сиз да убагында айта албагандайсыз. Жетекчиликке айта турган сөзүңүз болсо, айтыңыз, мен каршы эмесмин», — деди Абдыкадыров.
«Шаар таштандыдан качан тазаланат?» — деди Сатыбалдиев.
«Жакында таштанды чыгаруучу жабдууларды сатып алып, системаны толугу менен өзгөртөбүз», — деди мэр. «Сиздин кесипкөйлүгүңүз боюнча мен президентке кайрылуум керек экен», — деди депутат. «Сиздин эркиңиз», — деп жооп берди мэр.
«Сиздин жеке таарынычыңыз бар, мен аны билем. Үйүңүздүн тосмосун менин орун басарым буздурду. Мыйзам алдында баары бирдей. 70 тургун өз алдынча тосмолорду бузушкан. Гранттык каражатка жасалып жаткан тротуардын курулушуна тоскоол болдуңуз. Өзүңүздү сыйлаңыз, мандатыңызды сыйлаңыз», — деди Абдыкадыров.
Парламент төрагасы Нурланбек Шакиев депутат менен айтышпоого чакырды. «Бул анын деңгээли, мен бул жерде үй жөнүндө такыр айткан жокмун. Сураныч, жеке мамилеге өтпөңүз. Мен ошондо айткам, мыйзам силер тарапта деп. Бирок шоу кылдыңар. Азыр каражаттын жоктугунан курулуш иштери токтоп, 70 жашоочунун укугу бузулуп жатат», — деп белгиледи депутат.
