Демилгечилер – депутаттар Медер Чотонов, Исманали Жороев, Бахридин Шабазов, Нуржамал Торобекова, Жылдыз Эгенбердиева, Гүлнара Баатырова, Эдита Тайгараева, Болот Сагынаев, Гүлсүнкан Жунушалиева, Бактыяр Калпаев.
Комитет төрагасы Ырысбек Атажанов негизги баяндамачыдан тышкары чакырылган тиешелүү мамлекеттик органдардын өкүлдөрү жыйынга онлайн форматта катышып жатканын белгиледи.
Аталган маселе менен демилгечилердин бири, депутат Медер Чотонов тааныштырды. Анын айтымында, токтом долбоорунун максаты «Баатыр эне» ордени менен сыйланган энелердин өзгөчө эмгегин таануу, билим алууга бирдей жеткиликтүүлүктү камсыз кылуу, ошондой эле үй-бүлөнү, энени жана баланы колдоо боюнча мамлекеттик саясаттын алкагында үй-бүлө институтун чыңдоо жана демографиялык өсүүнү камсыздоо үчүн шарттарды түзүү болуп саналат.
Депутаттар Салтанат Аманова жана Гүлай Машрапова «Баатыр эне» ордени менен сыйланган энелердин балдарына мамлекеттик билим берүү жеңилдигин берүү механизмдерине байланыштуу маселелерди такташты. Депутат Токтобүбү Ашымбаева жогорку окуу жайларындагы буга чейин каралган 10 миң гранттык орундан тышкары кошумча 500 гранттык орун бөлүп берүү тартиби тууралуу маселени көтөрдү. Эл өкүлү Болот Сагынаев «Баатыр эне» ордени менен сыйланган энелер үчүн пенсия курагына жеткенге чейинки мезгилде социалдык кепилдиктерди камсыз кылуу чоң мааниге ээ экенин белгиледи.
