Парламент деген сөз өзү французчадан алганда «сүйлө» дегенди түшүндүрөт, «макта» деген сөз эмес! Жанар Акаев Жогорку Кеңештин жалпы жыйынында кесиптештерине нааразычылык билдирди.
«Урматтуу кесиптештер, азыр сиздер сүйлөп жатканыңардан байкалып жатат. Биз, Дастан Бекешев, мен, Рыскелди Момбеков, биз эмне, Кыргызстанда жамандык болушун каалайбызбы? Жок. Өнүгүп-өссөк экен, олуттуу өзгөрүүлөр болсо экен, турмушубуз жакшырса экен, адилеттүүлүк болсо экен деген эле ой бизде деле. Анан айтып жатасыңар, «мүмкүчүлүк бериш керек» деп. Урматтуу депутаттар, мүмкүнчүлүктү ким бербей жатат? Мүмкүнчүлүктү бербедиби? Эл дагы берди. Мурдагыдай оппозиция да жок. Эң сонун мүмкүнчүлүк берилип жатат. Бирок биз, бийликке келип, келе элек адамга ушул Конституция менен мөөнөтүн узартып берип жатабыз, 2032-жылга чейин же болбосо 2037-жылга чейин президент болосуңбу деп. Эгер президент жакшы иштесе, күчтүү реформатор болсо мөөнөтү бүтүп баратканда эл өзү деле суранып алып калат, дагы иштеп бер деп. Биз болсо эч кандай ишин көрө электе эле мөөнөтүн узартып берген жатпайбызбы? Биз ошону айтып жатабыз. Экинчиден, жоопкерчиликти ким алат? Эгер азыркыдай кымбатчылык болуп жатса президент өкмөт башчыны жумуштан алат экен. Жоопкерчилик бир адамда болушу керек деп жатасыңар, туура. Бирок ошол жоопкерчилик Башмыйзамга жазылган жок да? Парламентте кызуу талаш-тартыш боло берет. Парламент деген сөздү французчадан алганда «сүйлө» дегенди түшүндүрөт, «макта» эмес. Ошондуктан бири-бирибизди айыптабай, өзүбүздүн пикирди айтууга дайыма бул жерде мүмкүнчүлүк болушу керек»,- дейт Жанар Акаев.
Жогорку Кеңештин жыйынын шилтемеден көрсөңүз болот.
