Президент Садыр Жапаров ЖККУга мүчө мамлекеттердин башчыларына кыргыз элинин сый-урматынын жана меймандостугунун символу катары колго жасалган панно жана улуттук музыкалык аспаптарды белек кылды. Беларусь башчысына добулбас, сыбызгы, Казакстан президенти Касым—Жоомарт Токаевге кыл кыяк, Орусия лидери Владимир Путинге комуз, ал эми Тажикстандын президенти Эмомали Рахмонго керней, сурнай тартууланган.
ЖККУга мүчө-мамлекеттердин башчылары саммиттин алдында «Ала-Арча» мамлекеттик резиденциясында этномаданий программа менен таанышышты. Конокторду кыргыз элинин салттуу турмушу менен маданиятынын элементтери көрсөтүлгөн “Кыргыз айылы” этнографиялык комплекси көрүштү. Анын ичинде боз үйлөрдүн жасалгасы, улуттук турмуш-тиричилик буюмдары, уз-чеберлердин эмгектери, ошондой эле уюмга катышуучу мамлекеттердин маданий өзгөчөлүктөрү көрсөтүлдү.
