Орусиянын президенти Владимир Путин Кыргызстан менен Тажикстандын чек арасындагы жаңжалды жөнгө салууда ортомчулук кылууга даяр. Бул туурасында анын басма сөз катчысы Дмитрий Песков журналисттерге билдирди.
«ЖККУ жана башка ушул сыяктуу ар кандай форматтарда бир экенибизди эске алуу менен президент Владимир Путин мүчө-мамлекеттердин ортосунда чыга турган курч көйгөйлөрдү чечүүдө ортомчулук ролду ойноого даяр. Ал муну бир нече жолу иш жүзүндө көрсөткөн», — деген Песков РИА Новости агенттигине.
Кыргыз-тажик чек арасында 28-апрелде чыр чыкты. Буга тажик тараптын Кыргызстанга таандык «Головной» суу бөлүштүрүүчү пунктунун аймагына видеокөзөмөл камераларын коюп баштаганы себеп болду. Кыргыз жарандарынын камераларды алуу талабын коңшулар угушкан эмес. Алгач ортодо кайым айтышуу жүрүп, кийин бири-бирине таш ыргытуу башталган. 29-апрелдин таңында кыргыз жарандарынын үйлөрү аткыланып баштаган.
