Жогорку Соттун мурдагы судьясы Камил Осмоналиевдин Бишкек шаарында жайгашкан хансарайы «Манас» улуттук театрына өткөрүп берилгени маалым болду. Ал УКМК тарабынан мыйзамсыз баюуга шектелип 2020-жылдын декабрь айында кармалган болчу. Атайын кызматтан мурдагы судьянын мүлктөрү деген маалыматтын ичинде VIP-шаарчадагы элиталык үйдүн сүрөттөрү да таратылган эле.
14-март күнү Министрлер кабинетинин төрагасынын катышуусунда Кыргыз улуттук «Манас» театрынын имаратынын ачылыш аземи болуп өткөн. «Бүгүнкү күндө 30 жыл аралыгында жетиштүү көңүл бурулбай келген көптөгөн жакшы демилгелер өлкө жетекчилигинин колдоосу аркылуу ишке ашырылууда. Алсак, «Манас» театрына имарат бөлүнүп берилген», — деген анда Акылбек Жапаров.
Театр 2021-жылдын сентябрь айында «Манас» эпосун, ошондой эле кенже эпосторду жана манасчы, дастанчылардын чыгармачылыгын сактоо жана жайылтуу максатында негизделген. Президенттин жарлыгы менен ага улуттук макамы ыйгарылган.
