Бишкектин мэриясына жаңы кызматка келбей жатып кеткен Нариман Түлеев кайра келем деп чыкты. Социалдык тармактагы баракчасына жазганына караганда, ал эгерде шаар башчылык үчүн күрөш тынчыбаса, анда биринчи вице-мэр кызматынан кеткени тууралуу арызын кайтарып алат. Кресло талаш эле эмес, мэриянын кызматкерлерине кысым көрсөтүү токтобосо, пандемияга байланыштуу кырдаал курчуп кетсе, ар кандай басып алуучулар Бишкекти тынч койбосо, анда Түлеев өзүн кызматкерлердин коопсуздугун камсыздоого жана иштин үзгүлтүккө учурабашына милдеттүүмүн деп эсептейт.
20-октябрда Бишкек шаарынын башчысы Азиз Суракматов отставкага кеткенин жарыялап, ордуна биринчи вице-мэр болуп дайындалган Нариман Түлеев калган. Бирок анын кызматка келиши коомчулукта “Бакиевдин кадры” деген сын пикирди жаратып, президенттин милдетин аткаруучу жана өкмөт башчы Садыр Жапаров менен болгон сүйлөшүүдөн кийин арыз жазып бергенин билдирген эле.
