Бүгүн, 26-сентябрда Жогорку Кеңештин төрагасы Нурланбек Шакиев Өзбекстандын расмий иш сапарынын алкагында аталган өлкөнүн Олий Мажлисинин Сенатынын төрайымы Танзила Нарбаева менен жолугушту.
Жолугушууда боордош эки өлкөнүн саясий-экономикалык, маданий-гуманитардык алакаларын арттыруу, парламенттер аралык кызматташтыкты кеңейтүү маселелери талкууланды. Нурланбек Шакиев расмий иш сапар менен келүүгө чакырып, жылуу кабыл алгандыгы үчүн Танзила Нарбаевага ыраазычылык билдирди.
Акыркы жылдары Кыргызстан менен Өзбекстандын ортосундагы байланыштар жигердүү өнүгүп жатканын белгилеген Нурланбек Шакиев: “Эзелтен эриш-аркак жашаган эки элдин калыптанган кызматташтыгын улантуу бабалардан калган баалуу вазыйпабыз. Аыркы жылдары кызматташтыкты кеңейтип, жетишилген келишимдерди ийгиликтүү ишке ашырууга басым жасалууда. Алсак, жакынкы аралыкта эле мамлекеттик органдардын жетекчилери ортосунда түрдүү багыттагы алтымыштан ашуун жолугушуу өттү. Бул коңшулаш жашаган эки өлкөнүн алакасынын артып жаткандыгынын далили”, – деди. Муну менен катар эки өлкөнүн байланышын чыңдоодо парламенттердин ролу чоң экенин айткан Жогорку Кеңештин төрагасы: “Биз алакаларды арттырууга багытталган бардык маселени талкуулап, кеңешип чечкенге кызыкдарбыз”, – деп кошумчалады.
Соода жүгүртүүнүн көлөмүн 2 миллиард долларга жеткирүү максатталганын эске салган Нурланбек Шакиев: “Бирок бул чек эмес. Биздин мүмкүнчүлүктөрүбүз өтө чоң. Чек арадагы өткөрмө жайларынын ачылышы, сентябрдан тарта ID-карта аркылуу эле чек арадан өтүү тартибинин киргизилиши байланышты дагы да күчөтөрү анык”, – деди. Билим берүү жаатында да жылыштар арбын экенин айткан төрага көптөгөн өзбекстандык студенттер Кыргызстандын университеттеринде ийгиликтүү окуп жатканын белгиледи.
Өз кезегинде Сенаттын төрайымы Кыргызстан Өзбекстан үчүн негизги өнөктөш мамлекеттердин бири экенин билдирип, салт-санаа, үрп-адаты, тили, дини окшош эки элдин алакасын арттыруу башкы максат экенине токтолду. “Саясий-экономикалык кызматташтык менен катар маданий байланыштарыбыз да жигердүү өнүгүүдө. Алсак, быйыл улуу калемгер Чыңгыз Айтматовдун 95 жылдыгына карата Өзбекстан Республикасында бир катар маарекелик иш-чаралар өтүүдө”, – деди Танзила Нарбаева.
Ошондой эле Өзбекстанда 300 миңден ашуун кыргыз улутундагы жарандар жашарын айткан Сенаттын төрайымы кыргыз диаспорасы эң активдүү экенин кошумчалады. Баарлашууда туризм жаатындагы кызматташтык тууралуу да сөз болуп, Танзила Нарбаева бала чагында Арстанбапка келип, эс алып кеткенин эске салды. “Кыргызстандын кооз жаратылышы жана көркөм табияты өзбекстандыктарды өтө кызыктырат. Андыктан, туристтик мүмкүнчүлүктөрдү да кеңейтип, эки тараптуу каттамдарды көбөйтүшүбүз зарыл”, – деди төрайым.
Жолугушуунун соңунда төрага Нурланбек Шакиев Танзила Нарбаеванын коштоосунда Сенаттын ишмердүүлүгү менен таанышып, Ардактуу коноктор китебине каалоо-тилегин жазып калтырды.
Эки элдин эриш аркак достугуна салымын кошкон Адам эки дуйнодо жараткандын ыраазычылыгына ээ болот Азамат
Нурланбек Шакиевдин Өзбекстанга болгон расмий иш сапары оң натыйжаларды берет деп ишенем. Өлкөнүн өнүгүшү үчүн чоң салым кошот.
«Алыскы туугандан, жакынкы кошуна» деген сөздүн эби бар деп ойлойм, салт-санаа, үрп-адаты, тили, дини окшош эки элдин илгериден жашоо тиргилиги чек арасы жок бир элдей эле болуп жашап келишкен ата бабаларыбыз, ошондуктан биз да ынтымакта жашасак, элибизде өнүгүү болот, мамлекет башчыларынын жасап жаткан аракеттери эң жакшы! Кошуна мамлекеттери менен ынтымагыбыз күчөй берсин!!!
Эки элдин ортосундагы ынтымакты артыруу керек. Акыркы убакта эки элдин ынтымагы кадыресе которулуп баратат.
Коңшулар менен жылуу мамиледе болуу жана соода сатыкты күчөтүү бул саясаттагы чоң жетишкендик болуп саналат азаматсыз Нурлан мырза
Акыркы жылдары эки мамлекет аралыгында өтө жогорку деңгээлде мамиле жаралып, кыргыз өзбек элдеринин арасында жылуу мамиле түзүлүп, меймандык катнаш өнүгүүдө. Чек ара ачылып ID паспорт аркылуу өтүш бул чоң жетишкендик. Эми өзбек туугандар бизге турист катары көп келише башташат. Бул экономикалык өсүшкө алып келет.
Нурланбек Шакиев жогорку деңгээлде иштеп жатат. Сөзсүз оң натыйжа берерине терең ишенем! Ишине ийгиликтерди каалайм!
Койгон максаттардын баардыгы ишке ашсын! Эн сонун!