Бүгүн, 5-ноябрда Ош шаардык мэриянын Фейсбуктагы расмий баракчасынан мурдагы мэр Таалайбек Сарыбашовдун үгүт видеосу «Ош Пресс Клуб» тайпасына бөлүшүлдү. Видеодо экс-мэрдин эл менен жолугушуу өткөргөн үгүт иш-чарасы чагылдырылган.
Видео боюнча Ош мэриясы маалымат таратып, расмий баракчага кимдердин кирүүгө мүмкүнчүлүктөрү бар экенин айтышты.
«Ош шаарынын мэри Алмаз Мамбетов жана мэриянын азыркы учурдагы аппараты шайлоого даярдык иштери башталгандан тартып президент Садыр Жапаровдун шайлоону таза өткөрүү, административдик ресурсту колдонууга кескин бөгөт коюу боюнча талаптарына ылайык, чараларды көрүп келе жатат. Буга чейин бир нече жолу жыйындар өтүп, кызмат адамдарына катуу эскертүүлөр берилип келген. Жетекчилердин шайлоого аралашып кетүү ыктымалдуулугунун алдын ала чаралары көрүлгөн. Ош шаардык мэриясы эч кандай кайсы бир талапкердин пайдасына иш алып барбайт. Шайлоону таза, адилеттүү өткөрүүнү гана максат кылат.
Талапкер Сарыбашовдун видео кайрылуусун Ош шаардык мэриясынын расмий баракчасына Ош мэриясын коомчулук менен байланыш кызматы бөлүшкөн эмес. Коомчулук менен байланыш кызматынын мурунку кызматкерлери Азамат Абсатаров менен Замира Ниязбековада баракчага кирүү мүмкүндүктөрү кол телефондорунда сакталып калган. Бөлүшүү ошол тараптан болгон. Тактап айтканда, талапкердин шайлоо штабында иштеп жаткан, коомчулук менен байланыш кызматынын мурунку жетекчиси Азамат Абсатаров тарабынан кокусунан бөлүшүлгөн. Себеби анын кол телефонунда мэриянын расмий баракчасынын администраторлугу сакталып калган. Администраторлуктан ушул күнгө чейин баш тарткан эмес. Бул иш боюнча аймактык шайлоо комиссиясы, шаардык ички иштер башкармалыгы тарабынан кызматтык иликтөө башталды. Ош шаарынын мэри Алмаз Мамбетов күнөөлүү жактарга, кызмат адамдарына чара көрүү боюнча тапшырма берди», — деп айтылат маалыматта.
