“Улуттар Биримдиги” саясий партиясынын лидери Мелис Мырзакматов Ош шаарындагы шайлоодогу мыйзам бузуулар боюнча президент Садыр Жапаровго кайрылды.
Анын айтымында, Ош шаарындагы шайлоо тилкелеринде мыйзамдар одоно бузулуп жатат.
«Урматтуу Садыр Нургожоевич, Ош шаардык кеңешиндеги шайлоо процессине көз салып, өлкөбүздүн тагдыры жана келечегине кызыкдар адам катары, мен Конституциянын кепили катары сизге түз кайрылууну чечтим.
Тилекке каршы, 2021-жылдын 11-апрелинде саат 14:00гө чейин, менин байкоом боюнча, Ош шаарында шайлоо Кыргыз Республикасынын мыйзамдарын одоно бузуу менен өтүп жатат.
Социалдык тармактарда административдик ресурстарды колдонуу жана шайлоочуларды паракорлук менен алдоо фактылары боюнча көптөгөн сүрөттөр жана видеолор жүктөлүп жатат. Учурдагы кырдаал, тилекке каршы, 2020-жылы 4-октябрда болуп өткөн жана республикада бийлик алмашуу үчүн детонатор болуп калган «бандиттик шайлоону» эске салат.
Бирок жергиликтүү бийлик бул мыйзам бузууларга бөгөт койбостон, ушул мыйзамсыздыкты өзүлөрү баштап жатышат. Жооптуу органдар мыйзам бузууга каршы чараларды көрүшпөйт.
Ош шаардык АШК, участкалык шайлоо комиссиялары, алардын көз карандысыз статусуна карабастан, жергиликтүү бийликтин жана статусу так эмес адамдардын толук таасири астында. Ушул фактылардын бардыгы Ош шаарынын мэриясы жана анын структуралык бөлүмдөрү кандайдыр бир шылтоо менен бир партиянын кызыкчылыгын көздөп жатышат.
Жогоруда айтылгандардын негизинде, мыйзамдуулукту калыбына келтирүү жана шайлоо жараянын мыйзамдуу жолго кайтаруу боюнча тез арада чараларды көрүүнү суранам», — деп айтылат кайрылууда.
