Президент Садыр Жапаров бүгүн, 5-февралда Пекин шаарында Кытайдын Мамлекеттик кеңешинин премьери Ли Цян менен сүйлөшүүлөрдү өткөрдү.
Алар эки тараптуу кызматташуунун актуалдуу маселелерин, соода-экономикалык жана инвестициялык өз ара аракеттенүүнүн келечегин, ошондой эле энергетика, инфраструктура, транспорт жана жогорку технологиялар жаатындагы биргелешкен долбоорлорду ишке ашырууну талкуулашты.
Мамлекеттик кеңештин премьери Ли Цян Кытай Кыргызстан менен стратегиялык өнөктөштүктү жогору бааларын жана өз ара пайдалуу кызматташтыкты мындан ары кеңейтүүгө даярдыгын айтты. Ал биргелешкен инфраструктуралык жана инвестициялык долбоорлордун маанилүүлүгүн баса белгилеп, өлкөлөр ортосундагы транспорттук байланышты өнүктүрүүнү колдоорун билдирди.
«Акыркы бир нече жыл ичинде биз эки тараптуу кызматташуубузду активдештирдик. Жогорку жана бийик деңгээлдердеги эки тараптуу сапарлар, эбегейсиз чоң долбоор — «Кытай — Кыргызстан-Өзбекстан» темир жолунун курулушунун башталышы, үчүнчү «Бедел» өткөрмө пунктунун ачылышы, өз ара сооданын көлөмүнүн болуп көрбөгөндөй өсүшү буга далил болуп саналат», — деди президент Садыр Жапаров.
Президент Садыр Жапаров КЭРдин эл өкүлдөрүнүн Бүткүл кытайлык жыйынынын туруктуу комитетинин төрагасы Чжао Лэцзи менен сүйлөшүүлөрдү өткөркөрүүсү күтүлүүдө. Мындан тышкары, мамлекет башчысы Харбиндеги IX кышкы Азия оюндарынын ачылыш аземине катышат.
Садыр Жапаровдун Кытайга болгон мамлекеттик сапары кечээ, 4-февралда башталып, сапардын алкагында КЭРдин төрагасы Си Цзиньпин, КЭРдин эл өкүлдөрүнүн Бүткүл кытайлык жыйынынын Туруктуу комитетинин төрагасы Чжао Лэцзи менен сүйлөшүүлөрү күтүлөт.
