ККМди базарларга киргизүү максатыбыз — көмүскө экономиканы ачыкка чыгаруу. Бул тууралуу президент Садыр Жапаров кезектеги маегинде билдирди.
«Кытайдан бизге өткөн товарлардын көлөмү 14 миллиард долларды түзөт. Биздин статистикалык маалыматтарга келгенде 4 миллиард доллар болуп калып атпайбы. Демек, көмүскө экономикага кирип кетип жатат. Дүңүнөн сатып жиберишип, салык төлөбөй чыгып кетишүүдө. ККМ киргизүү жолу менен гана биз республикада канча товар айланып жатканын көрө алабыз.
Патент менен олтура берсек, дагы 50 жылда да көрө албайбыз. Биздин максат патентти жок кылуу эмес. Патенттен болгону 35 миллион сом түшөт. Патентти он эсе көтөрсөң да, биздин бюджет үчүн деңиздин бир тамчысындай эле. Биз ККМ аркылуу дүң баада соода кылгандардын товар жүгүртүүсүн, жалпы экономиканы ачык көрүп туралы деп атабыз.
Цивилизациялуу өлкөлөр, керек болсо жакынкы кошуналар дагы эбак эле ККМге жана санариптештирүүгө өтүп кетишкен. Биз эле өтө албай жатабыз. Салыкты жашыргандарды аныктап чыгып, толук салык алсак пенсия, жөлөк пулдар, эмгек акылар мындан да эки-үч эсеге көтөрүлөт. Мамлекет күчтөнөт. Эл жакырчылыктан чыгат. Элдин өзүнө эле жакшы болот да», — деди ал.