Президент Садыр Жапаров бүгүн, 4-июнда Улуттук коопсуздук мамлекеттик комитетинин окуу-машыгуу борборунун ачылыш аземине катышты. Бул тууралуу президенттик аппараттан билдиришти.
УКМК кызматкерлеринин алдындагы сөзүндө мамлекет башчысы бүгүнкү күндө дүйнөдө болуп жаткан окуяларга ар бир мамлекет тыкыр байкоо салып жатканын белгиледи. Борбор Азия мейкиндигиндеги жана жалпы эле дүйнөлүк акыбалга жүргүзүлгөн талдоолор көрсөткөндөй, Кыргызстандагы коомдук-саясий абалды нугунан чыгарып, туруксуздаштыруу ниетин көздөгөн эл аралык террористтик, диний экстремисттик уюмдар, баӊгизат трафигиндеги жана транс-улуттук кылмыштуу топтор мамлекетибиздин коопсуздугуна күтүүсүз коркунучтарды жаратышы толук ыктымал.
Президент аймактагы жана дүйнөдөгү кырдаал, заманбап чакырыктар жана коркунучтар бийликтен өлкөдө улуттук коопсуздукту жана социалдык туруктуулукту камсыз кылуу боюнча чечкиндүү жана ырааттуу чараларды көрүүнү талап кылып жатканын белгиледи. Ошондуктан, аскер бөлүктөрүнүн жана атайын багыттагы аскерлердин күжүрмөн даярдыгын такай кармап туруу үчүн Кыргыз Республикасынын Куралдуу Күчтөрүн чыңдоого өзгөчө көңүл бурулууда.
Садыр Жапаров өлкөнүн коргонуу жөндөмдүүлүгүн чыңдоо максатында заманбап курал-жарактар, күжүрмөн техникалар сатылып алынып жатканын эске салды.
Мамлекет башчысы терроризм жана башка кылмыштуу жосундар менен күрөшкөн атайын түзүмдөрдүн кызматкерлеринин квалификациясын жогорулатуу, ошондой эле өлкөнү террорчулардан коргоону жакшыртуу жана күчөтүү максатында бардык эл аралык талаптарга жооп берген Окуу-машыгуу борборун түзүү зарылдыгы келип чыкканын белгиледи.
“Мындай борборлор чет өлкөлөрдүн жана коӊшу мамлекеттердин атайын кызматтарында бар экенин билесиздер. Өткөн жылы жогоруда аталган азыркы замандын чакырыктары менен коркунучтарын эске алып, Улуттук коопсуздук мамлекеттик комитетинин демилгеси менен жаӊы окуу борборунун пайдубалы түптөлгөн. Бүгүн мына ал борбордун курулушу бүтүп, пайдаланууга берилип отурат”, — деди ал. Ошондой эле, бул жерде кызматкерлердин тажрыйбасын такшалтып, толук кандуу машыгып, дасыккан адис болуп чыгышына зарыл шарттар түзүлүп, тийиштүү материалдык-техникалык база менен жабдылганын кошумчалады.
Андан соң, Садыр Жапаров окуу-машыгуу борборунун курал-жарактары жана казармасы менен таанышты.
