Садыр Жапаровдун президенттик кызматка киришүү аземинде артиллериялык аскер техникасы колдонулат. Президенттин маалымат катчысы Галина Байтерек бул иш боюнча түшүндүрмө берди.
Президенттик пресс-катчынын айтымында Садыр Жапаров президент болуу менен катар өлкөнүн Куралдуу күчтөрүнүн Башкы колбашчысы милдетине да киришет. «Мындай кадам дүйнөлүк тажрыйбада кеңири колдонулуп келе жатат»,- дейт Байтерек. “Баарыңыздарга белгилүү болгондой, инаугурация аземи мамлекеттик деңгээлдеги иш-чара. Президенттик кызматка киришүү менен Жапаров өлкөнүн Куралдуу күчтөрүнүн Башкы колбашчысы болот. Андыктан артиллериялык аскер техникасын колдонуу аталган иш-чаранын белгилеринин бири. Аскерлерди даярдоо планына ылайык, артиллериячылар аскер даярдыгы боюнча пландык машыгууларды өткөрөт. Бул учурда кошумча эч кандай чыгымдар болбойт”, — деп жазды Байтерек.
Белгилей кетсек, Садыр Жапаровдун президенттик кызматка киришүү аземи 28-январда, Бишкектеги Токтогул Сатылганов атындагы улуттук филармонияда өтөт. Ал инаугурацияга пландалган президенттик кортеж, банкет жана башка ыксыз чыгымдардан баш тарткан.
