Жогорку Кеңештин депутаттарын шайлоого талапкерлер жана партиялар 1,5 миллиард сом сарпташкан. БШКнын алдындагы Көзөмөлдөө-текшерүү тобу шайлоо өнөктүгүнүн каржыланышы жөнүндө маалымат жарыялады.
Ага ылайык, 29-ноябрына карата алынган банктык маалыматтарда талапкерлердин жана саясий партиянын шайлоо фонддорунун атайын эсептерине түшүүлөрдүн жалпы суммасы 1 миллиард 791 миллион сомду түздү, анын ичинде:
— талапкердин өз каражаттары – 1 миллиард 092 миллион сомду;
— саясий партиянын өз каражаттары – 3, 797 миллион сомду;
— жеке жактардан түшкөн ыктыярдуу салымдар – 659,063 миллион сомду;
— юридикалык жактардан түшкөн ыктыярдуу салымдар – 13,208 миллион сомду түздү.
Ал эми туура эмес түшкөн төлөмдөрдү кайтаруулар 22,079 миллион сомду түздү.
Ошентип, чыгымдарды жабууга талапкерлердин, саясий партиянын шайлоо фонддорунун каражаттарынан 1 млрд. 582 млн. сом сарпталган.
Алар эмнелерге коротулду:
— мамлекеттик жана муниципалдык мекемелерге кызмат көрсөтүүлөр үчүн (мамлекеттик менчикте жана муниципалдык менчикте турган жайларды, имараттарды жана курулмаларды ижарага алуу, маданият мекемелеринин залдарын жана жайларын, ошондой эле жабдууларын, инвентарларын берүү, маалыматты жана мөөрдү берүү боюнча классификацияланбаган кызмат көрсөтүүлөр ж.б. үчүн) – 158,9 миллион сом;
— ар кандай кызмат көрсөтүүлөр үчүн (анын ичинде командировкалык чыгымдар, байланыш кызматтары, товарларды, жабдууларды, күйүүчү-майлоочу майларды сатып алуу, ижара боюнча кызмат көрсөтүүлөр, маалыматтык, консультациялык мүнөздөгү кызмат көрсөтүүлөр жана контракттар боюнча ыйгарым укуктуу өкүлдөргө, ишенимдүү адамдарга, байкоочуларга, үгүтчүлөргө, штабдын кызматкерлерине ж.б. көрсөтүлгөн кызмат көрсөтүүлөр) – 1 миллиард 134 миллион сом;
— үгүт материалдарын даярдоо жана таратуу боюнча кызмат көрсөтүүлөр (басмакананын кызмат көрсөтүүлөрү, маалыматты жалпыга маалымдоо каражаттарында жана интернет-басылмаларда, социалдык тармактарда жайгаштыруу, SMM кызматтары, саясий жарнаманын таргети ж.б.) үчүн – 230,7 миллион сом (анын ичинде ден соолугунун мүмкүнчүлүктөрү чектелген шайлоочулар үчүн маалыматтык материалдарды даярдоо боюнча кызмат көрсөтүүлөр үчүн – 8,9 миллион сом (3,9%);
— шайлоо өнөктүгүн өткөрүү менен байланышкан аткарылган иштер / көрсөтүлгөн кызматтар үчүн башка чыгымдарды төлөөгө 42,038 миллион сом.
Талапкерлердин жана саясий партиянын шайлоо фонддорунун пайдаланылбаган каражаттарынын калдыгы 209,2 миллион сомду түздү.
Ар бир талапкердин шайлоо фондуна түшкөн жана сарпталган каражаттардын суммасы мыйзамдардын ченемдерине туура келет. Башкача айтканда, 1 талапкерге 20 миллион сомдон ашпайт.
