Бүгүн, 17-сентябрдагы Жогорку Кеңештин жыйынында Жогорку Кеңештин төрагасы Нурланбек Тургунбек уулу Жогорку кеңеш өзүн-өзү таратып жатканы боюнча түшүндүрмө берди.
Ал VII чакырылыштагы парламентти таратуу боюнча депутаттардан демилге келип түшкөнүн белгилеп, бирок аталган сунуш жалпы депутаттардын кароосу менен чечилерин билдирди. Тагыраагы, төрага аракеттеги парламентти таратууга сырткы күчтөрдүн, президенттин же аткаруу бийлигинин мыйзамдык укугу жок экенин айтып: “Парламент өзүн-өзү гана тарката алат. Ага ылайык, депутаттар тарабынан атайын демилгечи топ түзүлүп, парламентти таратуу сунушун жүйөлүү себептер менен негиздеп, менин атыма кайрылууну киргизишти. Аталган кайрылууга 32 депутат кол койгон экен. Анын негизинде тиешелүү тапшырмаларды бердим, учурда керектүү иштер жүргүзүлүп жатат”, – деди.
Ошондой эле демилгечи топтун жүйөлөрү негиздүү экенин белгилеген Нурланбек Тургунбек уулу: “Өзүңүздөр жакшы билгендей, 2027-жылдын январь айынын акыркы жекшембисинде Президенттик шайлоо өтөрүн мыйзам менен так бекитип бергенбиз. Ал эми Жогорку Кеңештин депутаттарын шайлоо өнөктүгү 2026-жылдын ноябрь айында өтүшү керек болчу. Бирок чоң маанидеги негизги шайлоолордун катар-катар өтүшү саясий жактан да, экономикалык жактан да бир топ маселелерди жаратат. Борбордук шайлоо комиссиясы үчүн да техникалык эле эмес, физикалык жактан дагы оор болору белгиленген. Андыктан демилгечи топтун келтирген бул жүйөлөрү туура деп эсептейм”, – деди.
Андан тышкары, аталган жагдайга байланыштуу түрдүү сындар айтылып жатканын билдирип: “Демилгени көтөргөн депутаттардын же аны колдогон эл өкүлдөрүнүн шайлоого барууга моралдык укугу жок дегендер да болууда. Бирок бул акылга сыйбаган сын-пикир. Элден өткөн тараза жок, каалаган киши шайлоого катышып, элдин добушун алып депутат болсун”, – деген төрага шайлоодо жеткиликтүү добуш албагандар деле негизсиз сындарды айтып жатканын кошумчалады.
“Мурдагы добуш берүү өнөктөгү таза өткөндүгүнө байланыштуу ар кандай пикирдеги адамдар шайланып келген. Арасында эч кандай акчасы жок, элдин колдоосуна ээ болгондору да бар. Ушундай эле тартипте эмки шайлоо дагы таза өтөт”, – деди төрага.
