Бүгүн, 23-майда Жогорку Кеңештин төрагасы Нурланбек Шакиев Чүй облусундагы иш сапарынын алкагында Токмок шаарындагы №23 кесиптик лицейдин абалы менен таанышты.
Аталган билим берүү жайы 1957-жылы түзүлүп, учурда жыгач уста, унаа оңдогуч, ширетүүчү, ашпозчу өңдүү адистиктер боюнча 290 окуучу билим алат. Мугалимдер жана окуучулар менен жолугушуу учурунда Нурланбек Шакиев акыркы жылдары мамлекет тарабынан билим берүү тармагына өзгөчө көңүл бурулуп жатканын белгилеп: “Өлкөнүн бардык аймагында жаңы мектептердин жана бала бакчалардын имараттары курулуп, агартуучулардын айлык маянасын кийинки жылы дагы көтөрүү пландалууда. Ошондой эле кесиптик лицейлердин ишмердүүлүгүн жакшыртууга багытталган аракеттер да жигердүү жүргүзүлүүдө”, – деди.
Муну менен катар өлкөдөгү жаңыланууларга учкай токтолгон төрага: “Курулуш, коммуникация тармактарында, айрыкча тейлөө кызматтарында кесиптик лицейлерден билим алган адистерге муктаждык чоң. Андыктан билим менен тажрыйбаны айкалыштырган адистерди чыгарып, өлкөдөгү өзгөрүүлөргө өз салымыңарды кошосуңар деген ишеничтемин”, – деди.
Андан тышкары, жолугушууда лицейдин жылытуу системасын жаңыртуу маселеси көтөрүлүп, 30 жылдан бери оңдоп-түзөөдөн өткөрүлбөгөн системаны калыбына келтирүүгө 1 миллион 700 миң сом талап кылынары айтылды. Төрага аталган маселени өз көзөмөлүнө аларын билдирип, жыл аягына чейин жылытуу системасын толук жаңыртуу тапшырмасын берди.
Нурланбек Шакиевди депутаттар Айбек Маткеримов, Эмиль Токтошев, Жанарбек Акаев, билим берүү жана илим министри Каныбек Иманалиев, финансы министринин орун басары Руслан Татиков, Архитектура, курулуш жана турак жай-коммуналдык чарба мамлекеттик агенттигинин директорунун орун басары Бакытбек Кудайбергенов баштаган жергиликтүү бийлик жетекчилери коштоп жүрөт.
