Премьер-министр Улукбек Марипов авиабилеттерге бааны төмөндөтүү жана «COVIDсиз саякатта» долбоорун ишке ашыруу маселеси боюнча кеңешме өткөрдү. Бул тууралуу өкмөттүн басма сөз кызматынан кабарлашты.
Министрдин айтымында, көрсөтүлгөн маселелер боюнча бир катар мамлекеттик мекемелердин ишинин натыйжасы төмөн болуп жаткандыгы белгиленди.
«Сиздердин аракетсиздигиңизден улам айрым ишкер жарандар сапарга курч муктаждыкты тастыктоочу «негиздеме» — документти бизнеске айлантуусуна алып келди. Сиздер долбоордун ишке ашырылышын тыкыр иштеп чыгып, 1-апрелден тарта аны ишке киргизүүңөр керек эле. Биздин жарандар үчүн Евразия экономикалык бирлиги өлкөлөрү ортосунда жүрүүсү үчүн мыкты мүмкүнчүлүк түзүлдү. Болгону ПЦР-анализ тапшырып, тийиштүү тиркемени көчүрүп алуу керек. Бирок эки лаборатория гана аталган анализди жасап, код бере алат. Эмне себептен лабораториялар аз камтылган?» — деп сурады Улукбек Марипов.
Ошондой эле ал өкмөт авиабилеттерге бааны төмөндөтүү, үзгүлтүксүз авиакаттамдардын санын жогорулатуу үчүн бардык күч-аракетин жумшап жатканын кошумчалады.
«Азырынча бул маселелер толук кандуу чечиле элек болгондуктан, катардагы жарандардын жашоосун жеңилдетүү үчүн бардык мүмкүнчүлүктөрдү пайдалануу керек. «COVIDсиз саякатта» долбоору ЕАЭБ өлкөлөрүнүн тургундарынын жүрүү кыймылын жеңилдетүүгө багытталган, мында учурдагы талаптардын сакталышы камсыздалат», — деп белгиледи өкмөт башчы.
Марипов тийиштүү анализдерди тапшырууга мүмкүн болгон лабораториялардын жана үзгүлтүксүз авиакаттамдардын санын жогорулатуу боюнча сунуш киргизүүнү тапшырып, бул маселе өлкө башчынын жеке көзөмөлүндө тургандыгын белгиледи.
