Бүгүн, 15-октябрь күнү футбол боюнча Кыргызстандын Улуттук курамасы 2026-жылы өтө турган Дүйнө Чемпионатынын тандап алуу оюндарынын үчүнчү баскычынын алкагында Түндүк Корея менен оюнда кез келет. Дүйнөлүк биринчиликтин эки жолку катышуучусуна каршы болгон беттеш Бишкектин Дөлөн Өмүрзаков стадионунда саат 20:00дө орун алат.
Көрүүчүлөрдү саат 18:00дөн тарта атайын шоу-программа күтөт, анын катышуучусу эстрада жылдызы Мирбек Атабеков болот.
Үчүнчү баскычта 18 курама алты командадан турган үч тайпага бөлүнгөн. Бул этаптагы оюндардын жыйынтыгы боюнча ар бир тайпадан эң мыкты эки команда 2026-жылы өтө турган Дүйнөлүк биринчиликке жолдомо алышат. Төртүнчү квалификациялык раундда Азиядан дагы эки катышуучу аныкталат жана континенттер аралык плей-офф аркылуу Дүйнөлүк чемпионатка катышуу үчүн дагы бир орун үчүн күрөш жүрөт. Биздин курама команда Иран, Катар, БАЭ, Түндүк Корея жана Өзбекстандын курама командалары менен биргеликте «А» тайпасында жайгашкан.
